Dixitalización Asociación Cultural e Veciñal San Breixo de Pidre

Proxectos Non Produtivos – Entidades Privadas

Expediente: L21-19.20-10-0259
Promotor: Asociación Cultural e Veciñal San Breixo de Pidre
Concello e Lugar: Pidre (Xinzo de Limia)
Puntuación: 55
Orzamento Aceptado: 1.237,00 €
Porcentaxe axuda: 67,27%
Contía Axuda: 832,13€

Os recursos da axuda irán destinados a dotar a Asociación Cultural e Veciñal de San Breixo de Pidre dunha ferramenta informática que permita aos socios a participación nos proxectos de dinamización sociocultural que a asociación pretende realizar.

É unha asociación de recente creación que comezan a súa andaina na antiga escola rural do pobo cedida para o seu uso polo Concello de Xinzo de Limia. As instalacións non dispoñen de ningún equipamento informático nin audiovisual que facilite o desenvolvemento e execución do conxunto de actividades de forma axeitada.

A asociación dirixe as súas actividades a promover a participación das veciñas e veciños na vida pública co fin de potenciar o benestar social e mellorar a calidade de vida no rural, así como difundir e defender valores de igualdade entre a veciñanza especialmente no relativo ao xénero e defender sectores sociais desfavorecidos loitando contra a exclusión sen esquecer as necesidades da poboación envellecida, predominante no pobo. Tamén promove patróns da vida saudable e a recuperación do patrimonio comunitario así como o desenvolvemento e mellora na cultura na aldea de Pidre. Polo tanto é preciso un equipo informático completo.

Punto de encontro en Pidre

Cristina é a presidenta da Asocación Cultural e Veciñal de San Breixo de Pidre, unha parroquia que ten unha ducia de casas habitadas entre semana.

Para loitar en contra do despoboamento e da soidade, naceu esta Asociación no ano 2020 que ten como local social a antiga casa escola. Decidiron amañar a segunda parte da casa e agora alí, grazas á adquisición deste equipo informático, a propia Asociación pode facer a súa propia xestión. Teñen pendente acondicionar a planta baixa.

Ademais disto, permite que sexa un punto de encontro para diversas actividades. Por exemplo, Cristina sinala que un par de nenos xogan ao xadrez e que decidiron organizar torneos onde se implicara máis xente e ás veces o profesor vailles dar a clase alí ao local social, empregando tamén o equipo máis o proxector para explicar.

Un dos grandes problemas dos que hai que tirar é o envellecemento da poboación. Por iso se realizan eventos para interactuar os máis novos cos máis maiores: magosto, San Xoán, reunións de comunidade… “Fixemos unha exposición de fotos antigas, onde aparecían os avós das persoas que hoxe teñen 80 anos e onde saían facendo os labores da época”, comenta Cristina, e isto sirviu para que se transmitira a cultura e o pasado entre as xeracións.

Ao comezar en plena pandemia tiveron que cancelar moitos plans, pero siguen organizando actividades e teñen en mente outras como proxeccións de películas, manualidades…

Pouco a pouco irán medrando, involucrando á xente e aínda que sexa pouco tempo de camiño Cristina está “contenta co que se leva feito”.

Imaxe Previa Execución

Imaxes Proxecto Executado

Local social Asociacón San Breixo de Pidre

Logos financiamentos GDR