Inés Rodríguez é a muller emprendedora que se atopa detrás de Rir & Co, un proxecto que naceu no ano 2015 con axuda do GDR Limia Arnoia e que vén de gañar o premio á Innovación Tecnolóxica na 13a edición dos Premios ao Desenvolvemento Rural.
Rir & Co é un proxecto que naceu do amor polo arte que ten Inés, en todas as súas opcións: debuxo, deseño, artesanía, pintura… Por iso decidiu crear o seu propio taller. Ela traballa dende o rural ourensán, concretamente dende Allariz. Dende esa pequena zona rural traballa para todo o mundo facendo tecidos artesanais actuais inspirados no pasado e na tradición que servirán para outros creadores ou serán pezas xa rematadas para o seu uso.
Ela mestura a cor, a natureza, técnicas de trenzado e tecido, bordado, ilustración, materiais naturais… Optimiza os recursos para lograr a sostibilidade en cada proxecto.
“Co” vén porque para ela é moi importante a colaboración, lograr proxectar as súas ideas e mesturalas coas dos demais, para, sobre todo, seguir aprendendo.
Marca Artesanía de Galicia
Rir & Co conta co selo de Artesanía de Galicia que outorga unha imaxe representativa dos produtores artesanais galegos e que aporta prestixio e sinal de identidade propia, ao igual que garante a calidade dos produtos.
Inés elabora os seus tecidos manualmente, sendo polo tanto, pezas todas únicas e personalizadas. O tear manual e o coñecemento de diferentes técnicas artesanais dálle a posibilidade de realizar infinidade de deseños téxtiles, tecidos naturais e sostibles… mesturando técnicas.
Todo isto require moita dedicación, constancia e concentración. Razóns máis suficientes para facerlle ganar o premio á Innovación Tecnoloxía da Consellería de Medio Rural.
Premios Desenvolvemento Rural
Este tipo de galardóns axudan a darlle valor ás propostas novas que xorden nos núcleos rurais para reflexar un signo de verdadeiro desenvolvemento rural na comunidade. Nesta ocasión, presentáronse 60 propostas nas diferentes categorías.
