Pensión Porta Sacra – Rehabilitación dun edificio para instalar un establecemento hoteleiro

No ano 2019 rehabilitouse en Maceda unha vivenda de tres plantas para acoller a Pensión Porta Sacra, un pequeno establecemento hoteleiro situado no centro da vila, que ofrece unha estancia agradable e con encanto aos seus hóspedes.

O Concello de Maceda é coñecido polo conxunto histórico do castelo, o tradicional entroido do Felo e a riqueza ambiental e paisaxística do lugar. A proximidade da vila á Ribeira Sacra, xunto á riqueza histórica e natural do entorno, levaron a Sara a apostar pola apertura dun establecemento hoteleiro no municipio.

Sara instalouse en Maceda tras coñecer ao seu marido e unha herdanza familiar deixou nas mans do matrimonio unha fermosa vivenda baleira, datada no ano 1900. Aproveitando a escasa oferta hoteleira do lugar e visualizando as posibilidades económicas, en relación co turismo, decidiron rehabilitar este espazo para instalar a Pensión Porta Sacra.

Nas instalacións desta pensión, ademais dos dormitorios, distribuídos polas tres plantas do edificio, atopamos unha cafetería, onde destaca a súa marabillosa terraza, que permite desfrutar unhas ricas tapas acompañadas das preciosas paisaxes da contorna.

A proximidade da Pensión Porta Sacra coa Ribeira Sacra, e tamén coa cidade de Ourense, fan que a súa localización sexa inmellorable, presentándose como unha opción económica e de calidade para os visitantes que queiran coñecer a zona.